Nere bordatxotik

Basarri

 Gipuzkoar obispoa

 Erroma aldetik berri eder bat

 etorria da gurera,

 jakin utsakiñ gipuzkoarrok

 erruz alaituak gera.

 Barruti onen buru zaitugu

 Jauna, emendik aurrera,

 Ongi Etorri, gotzai maitea,

 zeu jaio ziñan lurrera.

 Lantoki orrek izango ditu

 milla kezka ta ardura,

 Alaitasunak izango dira,

 baitare ainbat tristura.

 Ardi guziak banatu ondo

 bakoitza bere lekura,

 Eleiz ontzia zuzen jun dediñ

 egizko bere portura.

 Erri ta mendi, azkar zabaldu

 baita albiste on ori,

 Lendabiziko esker sutsuak

 zerutan degun Jaunari.

 Egun alaia iritxi zaigu

 oraintxe euskaldunori,

 Burumakurka musu bero bat

 dakarzun eraztunari.

 ***

 Giro txarra

 Beti tristurak izaten dira

 pozaren aldamenean,

 Ai, negarrezko erbeste ontan

 nor dago zorionean?

 Gure kanpoa egonagatik

 itxurik ederrenean,

 Zer naigabeak etortzen diran

 gutxien uste danean.

 Aurten euria oso sarri ta

 neurriz kanpo egiten du,

 Laño pixuak buru gañetik

 ezin ditugula kendu.

 Ekaitzak beti ondoren txarra

 guziz nabarmen uzten du,

 Arto tenteak etzan dira ta

 patatak berriz usteldu.

 Gerturik egon bearra dago

 datorkiguna artzeko,

 Norbaitek ba-du abildadea

 oker danak zuzentzeko.

 Oraindik ezta, ez, motiborik

 itxaropena galtzeko,

 Udazken on bat izan dedilla

 al dana baliatzeko.