Martxoa jaso nuen

Basarri

 Martxoa jaso nuen

 aurretik goraiño,

 mintzea naiago du

 gozatzea baiño.

 Otza sartu diguzu

 ezurretaraiño,

 petral agertzen zera

 aurten oraindaiño.

 Izotz eta jelate,

 petraltasunean,

 kanpoa ta gizenok

 estuasunean.

 Gelditu nai baduzu

 itxura onean,

 aldatzen asi zaite

 zeuk nau duzunean.

 Emateko guzia

 neguak emana,

 zugan jarri genduen

 itxaropen dana.

 Beste modu batean

 egin zazu lana,

 txarrari ezin eman

 guk onaren fama

 NEKAZARIAK ASARRE

 Kopeta beltzarekin

 milla nekazarik,

 ezin onartu dute

 oraingo martxarik.

 Oso asarre dira,

 or ez da txantxarik,

 ez daukate gaiñera

 arrazoi faltarik.

 Prezioak goraka

 ez dijoaz mantso,

 gaur zortzi pagatua

 bostean zan atzo.

 Beurak egindakoa

 merke saldu oso,

 modu ortan bururik

 ezin leike jaso.

 Gure nekazaria

 antsiz eta miñez,

 bizimodurik emen

 atera eziñez.

 Zorrak baldin badatoz

 lanaren ordaiñez,

 pazientzi-neurriak

 egingo du gaiñez.

 Esnearekin ere

 komeri larriak,

 zenbat neke alperrik

 gaur nekazariak.

 Aldatzen ezpadira

 lege galgarriak,

 derrigor ustu bear

 gure baserriak.

 Artzen dana garesti;

 merke eman zeurea,

 lanean jarraitzeko

 nork du balorea?

 Aldatu dezatela

 lenbailen legea,

 bizitzeko bear du

 bakoitzak berea.

 Zuen lanak saria

 jaso bear dute,

 eta jo, beldur gabe,

 bear ainbat ate.

 Ez dago izaterik

 beti "etxekalte",

 ortzak erakustera

 beartu zerate.