Jesus'en jaiotza

Basarri

 -1-

 Orain bi milla urte inguru

 mirari paregabea,

 gizon aragiz sortu zitzaigun

 Zeru ta Lurren jabea.

 Gure mallara jetxita ortxe

 Jaungoikoaren semea,

 argatik degu guk biotzean

 atsegin bete betea;

 baña erreguz ementxe nator

 ementxe, Jesus maitea,

 azaldu bear dizugu danok

 daukagun borondatea

 au da Zarautz'ko Kabitarrak gaur

 egiten duten eskea,

 asmo oneko gizon guziei

 eman zaiezu pakea.

 -2-

 Arrokeri ta dirua dabill

 alde guzitan balantzan,

 beko -jendea, jende txikia,

 etengabeko morrontzan.

 Zu jaio baño lenago ere

 gure mundu au ola zan

 eta itxuraz ezta oraindik

 zuzentzeko esperantzan,

 pake kontua gai artuta nik

 eztet asmatzen zer esan,

 zure sortzea ez al zan, Jesus,

 alperrikakoa izan?

 arabe jende ta judutarrak

 otso amorratu gisan,

 zeu jaio ziñan lur santua artan

 ara nolatan dabiltzan!

 -3-

 Begira bazter guzitara ta,

 nunai sua dariola,

 txarrena au da, oni azkenik

 barrundatzen etzaiola.

 Esaten dago karidade ta

 maitasunik eztagola,

 onetik iñork eztu ezer nai

 danok txarreko eskola;

 sarritan galdetzen det nik, Jesus,

 baña au guzia nola!

 geurea egin da bestegatik

 ezer eztigu ajola,

 Etenik gabe gerra bizian,

 ezin konpondu iñola,

 uste orretan etzendun eman

 zuk gurutzean odola.

 -4-

 Berdingabeko Gabon gau ontan

 «Basarri'k» kantuz goraintzi,

 artzai jende ta aingeruekin

 egin dezagun irrintzi.

 Ainbat gizaldiz zai egon eta

 Salbatzallea iritxi,

 illun guziak uxatu dira

 argitasuna nagusi;

 zure jaiotzak bide eder bat

 guziori erakutsi,

 mugak jarriak dauzkagu danok

 beti ez gindezke bizi;

 zure aurrean izango gera

 Jesus, biar edo etzi,

 arren da arren, ez gaitzazula

 zure eskutatik utzi.