Iruntxiberri

Eizmendi, Iñaki

 -1-

 Aia erriak deporterako

 balio du izugarri,

 lengoak lengo, oraingo au nik

 goi-maillan nai nuke jarri.

 Euskaldunetan geienak dute

 gure gizonaren berri,

 txiki aundiak izaten dira,

 ete bat "Iruntxiberri".

 -2-

 Orrek auzia bere aldera

 beti garbi erabaki,

 bein jokatzera joaten danean

 kontu pixka bat eduki.

 Buruz ez dago oso motela:

 zer egiten dun ba-daki,

 begiratuta gorputz exkaxa,

 baiña indarra galanki.

 -3-

 Askok pentsatzen zuten len ere

 menderatuko zutela

 gero ikusi zuten kukuak

 txit oker jo zietela.

 Arrigarrizko auspoa dauka;

 ain da zail eta ximela,

 kontrariorik ez du aurkitzen

 korrika ari bezela.

 -4-

 Ariña baita lumaren gisan,

 gutxi zanpatzen du lurra,

 baiña jokoak irabazteko

 ba-du orretxek adurra.

 Ia lurrean ageri ezta

 nunai sartzen du beldurra,

 puska bi laister egiten baitu

 kana-beteko egurra.

 -5-

 David txikiak Goliat aundi

 menderatu zun antzean,

 "Iruntxiberrik" bikaiñagoak

 izaten ditu erzean.

 Aundiak bapo txikitzen dira

 Orren ondoan jartzean,

 belar ebaten eta korrika

 nork utziko du atzean?

 -6-

 Patxaran eta apal esango

 dizkitzu esatekoak,

 papera egin baiño lenago

 ondo pentsatutakoak.

 Orren talentu oiek ez dira

 bazterrera uztekoak,

 jokoak nekez egingo ditu,

 baiña irabaztekoak.

 -7-

 Sasoi aparta, iñolaz ere

 Aia-ko txikiarena,

 erakutsia dauka ederki

 erruz balio duena.

 Ogeitamalau urte ba-ditu,

 elduta dago txermena

 denbora gutxi gelditzen zaio,

 orixe dauka txarrena.