Gure mixiolariak
Basarri
Orra or gure anai maiteak
agurka, biotz sendoaz,
Beren guraso ta senidien
negar malkoak itoaz.
Danok Jabe bat degula jakiñ,
ta oroituz gerokoaz,
Illunpe beltzez dauden animak
argitutzeara dijoaz.
Agur, baso ta mendi laztanak,
agur, baserri txuriak,
Agur, amatxo, anai arreba
eta lagun bereziak.
Iñork ez aña maitatzen ditu
lur ontan jaio ta aziak,
Kristo'ren sallak ugaltzearren
utzi dituzte guziak.
Jesus gureak etzuen egiñ
iñoitz txantxetako itzik,
«Lurbira dana korri zazute
izan gabetan zalantzik.
«Ni, ezagutu gabe ez dedilla
gelditu zuri ta beltzik»,
Mixiolari Jaungoikozko oiek
ez dute beste ametsik.
Gure anaiak sartu zaizkigu
federik ez dan tokira,
Ango jendeak ekarri nairik
amairik ez dun argira;
zenbat burruka ta eragozpen,
danak esango balira...
Beste batzuek salbatzearren
berak an ondatzen dira.
Urri'ko illan ogeitabata
Mixiolari Eguna,
Kristo'ren talde bulartsu ori
gogora bear deguna.
Otoitzarekiñ, diru laguntza,
danoi eskatzen zaiguna,
Ezagueratik ondo zaude ta
portatu zaite, euskalduna!
Ainbat euskaldun mixiolari
bada or zear juanik,
Laguntzik gabe nolatan egiñ
gogozko luteken lanik.
Indarberritu ditzagun gogor
al gentzakena emanik,
Ez dezatela pentsa euretzaz
aztuta bizi geranik.