Gaillurrean gera

Basarri

 -1-

 Jantzi apaiñez dago

 euskaldunon lurra,

 gelditzen dan zatia

 bai zati apurra!

 Emengo gorabera

 oso da laburra,

 aurtengo udaldiak

 artu du gaillurra.

 -2-

 Gabak luzatuz beti,

 asetzeko loaz,

 egunak laburtuaz

 ta bazterra joaz.

 Andra-Mari ezkero

 bakantzera goaz,

 bi erortzen badira

 lau iges dijoaz.

 -3-

 Lantua ta marmarra

 ugari da emen,

 askoz jende obea

 izaten zala len.

 Juxtu-juxtuan pasa;

 etxera lenbailen

 diru sobre aundirik

 apenas dabillen.

 -4-

 Beatz aundia jaso

 kamio ertzetik,

 egundoko pardelak

 dituzte atzetik.

 Dirurik etzaiote

 erortzen poltsetik,

 ortarako irteten

 al dira etxetik?

 -5-

 Ez dira puntakoak

 dabizkiten telak,

 garbitasun alerik

 ez duten txepelak.

 Bizar da illez ondo,

 dirutan motelak,

 oiekin jai daukate

 emengo otelak.

 -6-

 Ugaltzen ari dira

 urtetik urtera,

 gustatuta ez leike

 sartu bat tartera.

 Ori bada turistak

 bear dun tankera,

 obe degu etxetik

 oiñik ez atera.

 -7-

 Beti aritu gabe

 jo ta ke lanean,

 egun bakar batzutan

 jai udazkenean.

 Uste det gozatzea

 nik oiek aiñean,

 artzaiekin bilduta

 Urbia gaiñean.