Euskal sukal bazterrak
Basarri
Negu beltzean, denboraleak,
sarri jokera zatarrak,
aizeak orru; trumoi-tximistak
berebiziko danbarrak;
ondoronean lelatil danak
autsi bear kaskabarrak,
une oietan zein goxo diran
euskal sukalde baztarrak!
Zuaitz gerri bat, zartu dalarik,
orra bertan sukartua,
otz beldur gabe pamili dana
beregan inguratua.
Ekaitz kontrako piztu dizute
kandela bedeinkatua,
marmar goxoan otoizten dute
errosario santua.
Zar eta gazte, aundi ta txiki,
Jaunaren itzal aundian,
Goiko Amari arrenka beti
beren izkuntza garbian.
Deabru danak jolastu bitez
nai badute atarian,
otoitzarekin itxaropena
fedea dagon tokian.
Federik eztan etxe oietan
sarri naigabe samiņa,
biraua buru; itz nabarmenak,
eta konpondu eziņa.
Arrixku txar bat datorrenean
beldurrez, kezka ta miņa,
otoizkarien itxaropena
eztegu gauza berdiņa!
Danok ibilli nai degu orain
gaurko munduan moldera,
amaika pauso ematen degu
bear eztegun aldera.
Zorigaitzean, ez ote goaz
amildegian gainbera?
geroni ere urte gutxian
geiegi zabartu gera.
Etxetar danak su inguruan
izketa ezti, goxotan,
aitona zarra billobatxoei
ipui-jario, bertsotan.
Gazte ta zarrak, danak paketsu,
maitasunaren besotan,
orrelakorik ezta ikusten
orain pamili askotan.
Mundua etsai gogorra degu,
beti zirika eztenak,
aginpideak geuk nai ditugu,
ezkaitu pozten bestenak!
Aurreko zarren errespetoak
eman zituan azkenak,
aundinaia ta dirua dira
gu ondatzen gaituztenak.
Gazte-zarretan ezpaldin bada
okerra ba-du norbaitek,
etxeko seme batek ezpadu
etxeko alaben batek.
Gaur negarra du lenago poza
zuan amaika sukaldek,
fedea ozten ari dalako
datoz ondoren txar abek.
Euskal sukalde biotzekoak
gorde suaren epela!
baņa biotzak fede sugarrez
gurikatu ditezela.
Pakea buru izan zazute
orain eun urte bezela,
lengo bidera itzul zaitezte
galdu zerate bestela!
***
"Abeletxe'ri"
O, "Abeletxe" aztu- eziņa
lagunak gera gu lendik,
zure berriak izaten ditut
andik ezpada emandik.
Gorputza lirain, kolore onak,
ori nabatu nizun nik,
urte sorta bat ba-dezu baņa
sasoiko zaude oraindik.
Biok Maņari'n alkartu giņan,
alkarri eskuak luza,
geroxeago bat kontatzen zan
zure ta nere gorputza.
Ainbeste kontu esateko ta
ain gendun denbora utsa,
egun jator bat igarotzera
etorri zaite Zarautz'a.
Gure txokoan jan da edanez
izaten dira aukerak,
pozik jarriko zaizkitzu emen
basoak eta platerak.
Zerbait gaztetu egingo nau ni
lagun, zure etorrerak,
gogoratuko ditugu bapo
Burdeos'ko goraberak.
***
"Zeruko Argia"
Okerrak sarri agertzen dira;
zuzenik ezin iritxi,
beko illarak gora pasota,
goikoak bera eratxi.
Nasteborraste onek eztigu
ematen naigabe gutxi,
Asarretzea alperrik da ta
artu zagun pazlentzi!
***
Eiztari artean Patxi'k
Lagun Pernando, aurtengo ontan
tiroz egiņak gaituk ler,
geienak zuzen irten itukan,
oso gutxi joanak oker.
Caceres'en zer boteak geran
jakin bear dek ik laister
zazpi erbi ta ogei koneju,
eta irurogei eper.
***
Pernando'k
Toki bat ona bear zenduten;
artu dezute Caceres,
kanpotik-sona aundiak eta
bertara joanda ezer ez.
Bapo osatu zerate erbiz,
konejuz eta eperrez,
zer preziotan saltzen dituzten
esan bear dek, mesedez!
***
Berekoetxea
Zu zera, Migel, aizkolarien
txapeldun sendo, trebea,
joko gogorra egin dezula
esanaz dago jendea.
Kontrarioa ezta aizkoran
iņoiz aritu gabea,
ta ebakiko ote dezu zuk
Mitxelena'ren doblea?
Zortzi oinbiko da zure lana;
or dago letra garbian,
kontrarioak lau bota bear;
erdia kontadurian.
Ni larri nago irabazle nor
gertatzen dan jakin naian
oso urrean izan nai nuke
azaroaren ogeian.
***
Pakea?
Asia ortan gertatzen dana
benetan kupiragarri,
itzak gozoak, putzak mingotzak,
jendean engaņagarri.
Zeņek ematen dio tankera
gaurko jende zital orri?
"Pakea" beti ezpaņetan da
lur danak odolez gorri.
***
Negu bidean
Aize ta euri, txingor da elur,
negu beltza inguratu,
danak indartsu agertzen dira
nai badegu konturatu.
Otxan da bare zegon denbora
orra erabat zakartu,
ederra pranko len egin du ta
eztaukagu zer kejatu.
Udazkenean aurrera goaz,
laister negua guretzat,
bearrekoa, degu au ere,
argatik sortu zan beintzat.
Ekaitzaldi ta denboraleak
artu ditzagun ba ontzat,
sasoian sasoikoa eginda
askoz obe da danontzat.