Etxean degu gaitza
Basarri
-1-
Zarautz erritik apalki nator
Aloņaren magalera,
ezin gorderik dauzkadan kontu
batzuk zuri esatera.
Ama laztana, entzun, arren! zuk
bertsolari eskaera,
bein bear eta Euskalerrian
zure bearrean gera.
-2-
Emen agertu ziņan garaian
zer naigabe ta samiņak,
esan zeikean danak zeudela
oso burutik egiņak;
Oņaztar eta Ganboatarrak,
lapurrak eta sorgiņak...
orduko marka guztiak orain
ez al daude eragiņak?
-3-
Ama maitea, zeure almena
garbi agertu zenduan,
arro ziranak apaldu ziran,
ta bearra bagenduan.
Otzago edo epelagoa,
fedea bazan orduan,
orain erabat galdu degu-ta,
animalien moduan.
-4-
Gure lurreko goraberak gaur
zein negargarri dabiltzan,
ekaitza pranko ikustekoak
gera munduko bizitzan.
Munich, Vietnam, ta beste ainbet
beti aotan ez izan,
begira zazun, O, euskaldunok,
etxean nola gabiltzan.
-5-
Alkar arteko adiskidetzak
joanak ditugu igesi,
iņorentzako errukiriz ez,
danerako geu lenbizi
Au egia da, anai maiteok,
eta ukatzen ez asi,
alkar ikusi baiņo naiago
suge-gorria ikusi.
-6-
Bizkar gaiņean artuak gaude
makiņabat danbateko
ta motiborik asko badegu
berriz kezkaz egoteko.
Deabruaren almen aundiak
artu gaitu gu menpeko,
len igaroak naikoa ezta
odol gorria tarteko.
-7-
Sendatu gabe dago oraindik
erri zar onen zauria,
beldur ikaraz jarria nago
sortu leikela berria.
Berriro ere infernu bizi
laister da Euskalerria,
maitetasunak artzen ezpadu
gorrotoaren tokia.
-8-
Lenez gaiņera ez gaitezela
anai artean zatitu,
zentzuz osatu gaitezen ondo,
umekeriak garaitu.
Gure lur onek begiak goruntz
Zugana jaso nai ditu,
ta okerrena gerta baiņo len
Ama, gutaz errukitu.
-9-
Anaiak nola ibili leike
alkarrekin arakintzan,
noiz jarri bear degu apalki
Jaunaren serbitzaritzan?
Gure babesle paregabea,
erri au kontuan izan,
olatu trakets, ondagarriak
azpian artu ez gaitzan.