Egun urratzez, lengo zugaitza

Eizmendi Manterola, Iñaki (Basarri)

 1

 Egun urratzez, lengo zugaitza

 mutu ikusten diat nik,

 Etzegok lengo «txioka» otsik,

 ez lengo alaitasunik.

 Iñoiz aspertzen ez intzan txori

 urretxindorra izanik.

 Nork uste behar zian aiñ azkar

 ezkutatuko intzanik?

 2

 Ilun da trixte gelditu gaituk

 ire lagun on giñanak,

 Mutu, ta bakar dagon zugaitzaz

 ainbat oroitzen geranak.

 Bukatu dituk ire samiñak,

 ire neke ta lan danak,

 Kantatu dituk mundu onetan

 kantatu behar ziranak.

 3

 Gure begiak ez aute berriz

 lur gaiñ ontan ikusiko,

 Lengo erara alkar tentatzen

 ez gaituk emen asiko.

 Gure jainkoak ez indukan i

 bazter batera utziko:

 Guretzat toki on bat gertu zak

 biar ezpada etziko.

 4

 Gure artetik goruntz baziak

 amaikatxo otoitz ixill,

 Gorputzez ezkutatua gatik

 espirituz urre abill.

 Beti gogoan izango augu;

 i guretzako ez aiz hill,

 Egun Aundia datorren arte,

 Agur, lagun zar «Errezill»!