Florezito eta Tronio, Azkoitiko torero sonatuak
1
Hara nere bertsoak
belarri ertzera.
Zezen kontuak dira,
ba al dezu aitzera?
Azkoitian pasiak
dirade gainera.
Nahiz ez dan hemen izan
hartako joera.
Gu ere danetara
probatuak gera.
2
Urteak omen dira
hirurogei edo.
Floriako mutil bat
zezen-zale bero.
Beste kontirikan ez,
ziola egunero:
«Ikusiko naute
ni laister torero».
Florezito bezela
ezaguna gero.
3
Florezito txikiak
musu makurrakin,
izugarrizko plantak
zituen berekin.
«Nola toreatu nik
bazekiat jakin:
Ixkue datorrenin
adar haundixekin,
hik beste aldera egin
behar dek kapakin».
4
Aterea baizuen
hainbeste zarata.
Izango zuela ba
aukera aparta.
Andremaxek gainien
omen zirela-ta.
Urretxu alde hortatik
ekarri beza ta;
zezenak Lasturkoak
aukera galanta.
5
Ailgatu ere bai
egun amestua.
Hainbeste jende plazan
hura zen gustua!
Florezito erdian
korajez prestua.
Zeini brindatuko ote
lehenengo ixkua
Mariano Atanori
jasorik eskua.
6
Bere ixko horrekin
hasi da lanian.
«Banderillak sartzeko
ointxe det parian».
Bat besterik ez dio
sartu ipar-gainian.
Jendea parrez ia
lehertu beharrian.
Bestea, hor botatzen du
aidera letxian.
7
Florezitok inundik
hartan ezin laga.
Korajetsu azalduz,
barrutik ikara.
Zezenak harrapatu
mila modutara.
Jainkoak ez zuen ez
gehiegi anpara.
«Nik behar det ixko hau
derrepente akaba».
8
Prantatu da hiltzeko,
hura zen figura!
Zezenari hor zaio
estiloz ingura.
Gehienez harrapatu
kostilla hezurra.
Zuri-zuri azpitik
ezpata muturra.
Azala besterikan
ezpazion urra.
9
Denboran behar orain
aurrera aditu.
Zinkuentako hamarkadan
ondoren gelditu.
Beste torero baten
kontuak argitu.
Egin omen zuen da
hainbeste meritu.
Tronioren konturik
nork ez du aditu?
10
Azkoitira lanera
etorritakua.
Andaluzitik edo,
traza hartakoa.
Beltza eta txikia
musua txatua.
Tximinotik berezi
ia ezinezkua.
Neska denei atzetik,
madarikatua.
11
Tronio hor ari da
aukera galdezka.
«Torero lanetako
aproposa naiz ta».
Ezertako ez danik
mundu hontan ezta.
Berakin kontatuta
programa da presta.
Andremai bosgarrengoz
izango da testa.
12
Tronio beltza hor dabil
bere bizikletan,
popaganda ipinten
herriko kaletan.
Korrida izango da
atsaldez bostetan.
Tronio, Barrerita
ta El Yankee bertan.
Ikuskizun ederra,
bai alajainetan!
13
Mila beratzireun
berroita hamaseian.
Agostuko hemeretzi
garren egunian.
Plaza jarria zuten
Zona Industrialian.
Festa hastekoa zan
eliz atarian.
Tronio errege gisa
Azkoitiko herrian.
14
Karro dotore baten
gainetik agertu.
Zaldi zuri eder batek
aurretik tiratuz.
Tronion traje horrek
alde danetik luz.
Jendea kale eta
balkoietan erruz.
«Viva Tronio» danak
fuerte oihukatuz.
15
Plazara ailegatuta
hasi funtzioa.
Tronio baliente
eta gallardoa.
Zezena zuzen-zuzen
beregana doa.
Aidean arrotu du
zazpi bat legoa.
«Adio Azkoitiarrak
ilargira noa».
16
Hondoa jo du eta
zezena hantxe zai.
"Maetro" tentetu da,
pasea eman nahi.
Joipurtzuloan da
bota du noranahi.
Trapu zaharra bezela
astindu ere bai.
Tonto usaiak ederki
kendu zizkion bai!
17
Zezena karteletan
Salamankakua.
Tronion ezjakinean
Tudela aldekua.
Behi petral bat
adar motzekua.
Alde hartako kaletan
ibilitakua.
Hangoak gozatzeko
izan zan nahikua.
18
Hoiek hola omen ziren
nahi bada sinetsi.
Aspaldiko kontuak
nahiz eta eritzi.
Jendeak jakin dezan
bihar edo etzi.
Nik inor merituan
ez nuen nahi jeitxi.
Tronio ta Florezito
milaka goraintzi!
Eizagirre, Xabier, ("Jauregi")
|