Artzain txabola

Ikasle

 Orra or goyan mendi egiyan

 Euskotar artzai txabola.

 Maitasunaren kabi bera da

 Izanik artzai etxola.

 ***

 Goiz alai batez eguraztera

 Irten nintzan, goiz, etxetik,

 Ta oartzeke gogaketetan

 Aldendu nintzan bidetik.

 Mendi goi baten oin-oñean...

 Ta... oldozketan burua

 ¿Mendin arkitu ote diteke

 Maitasun sukar goxua?

 Ta jarraituaz menditik ziar

 Gora-goraka ta aurrera

 Alai ta lasai iritxi nintzan

 Mendiyaren egalera.

 Andixek doi-doi zugatz artean

 Etxol txiki bat nekusan

 Euskotar artzai gogorrarena

 Etxol uraxe bera zan.

 Ta jakin miñez ta txit astiro

 Jo det etxetxo albua.

 ¿Mendin arkitu ote diteke

 Maitasun sukar goxua?

 Bere aurrari kun-kun abesten

 Andre bat dakust oñetan.

 Ta... ¡zeñen aurtxo polit ederra

 Zan aur uraxe benetan!

 Aurtxo txikiya bere amaren

 Abesti estiyaz poz-pozez...

 Amatxo berriz kutuntxoari

 Maiteki abesten biyotzez.

 Ta lo gozuan aurra utzita

 Malko dario begitik.

 Maitasunez ta pozaren pozez

 Lanera doa bertatik.

 Ardi zaintzetik artzaya ere

 Badator etxe aldera

 Bere andre ta semetxuakin

 Atsedentxo bat artzera.

 Seaska albora inguraturik

 Lo dakus aurtxo txikiya,

 ¡Artzai gogorrak semetxua ainbat

 Ez du maitatzen biziya!

 ***

 ¿Mendik arkitu ote diteke?

 Maitasun sukar goxua

 ¡¡Begira mendin artzai oyeri

 Zein maite zayen aurtxua!!