Futbola ez da justua
Egaņa, Andoni
Antzuolako futbol zelaian
bi talde gogorrek topo,
eguraldirik txarrena ere
ez zen gertatu ostopo,
zelai erdian primeran baina
harea barruan poto;
holaxe jardun ginen hamaika
bertsolari segapoto.
Han bazen tripa, bazen karkaxa,
bazen ipurdi galantik,
gai jartzaile ta antolatzaile,
ez zen epaileen faltik,
oso suabe jokatu gendun,
nabarmena da zergatik,
hurrena askoz puntuazio
hobea lortzeagatik.
Lehenengo gola sartu ziguten
baloi txar baten botean,
atsedenean konfiantzarik
bageneukan enpatean,
bi eta hutsa jarri ziraden
jokaldi triste batean,
bi linierrak kontu kontari
ari ziren bitartean.
Arbitro jauna txepel jardun zen
gure uste apalean,
kontrarioek astotasuna
zeramaten odolean,
atezainari hanka zapaldu
hirugarrengo golean,
haiek rugby-an egiten zuten,
guk ordea futbolean.
Nahiz bi gol sartu, gero gure gain
afariaren gastua,
partiduari azken orduan
hartu genion gustua,
ordu bete motz geratu eta
galdu gendun apustua,
txarrak txapeldun, onenak galdu,
futbola ez da justua.
|