Ezkon-berrieri

 1.

 Euskalerriko mendi eder ontan,

 Birjiñ onen babesean

 eta eskontza santutu zuan

 gurutzearen aurrean,

 sakramentu bat ospatzen degu

 bi euskaldunen artean.

 Jaunaren itza entzun ondoren,

 Elizaren izenean,

 iru oar esan nai dizkitzuet

 euskal era zaarrean.

 2.

 Kontzeju eder ta asko eman oi da

 au bezelako unetan,

 baña bat degu eskongaientzat

 bearrezkoena denetan:

 bera entzungo dezute laister

 Eleiz-otoitz guzietan,

 bera biziro nabaitzen degu

 baita guk denok barnetan:

 batipat maite ezazutela

 elkar beti ta benetan.

 3.

 Bai agirian, berdin barnean

 zaindu zuen siñismena,

 bizitzan zear bai'dezue izango

 oñarririk sendoena:

 Zorionean postasuna ta

 zori-txarrean euspena,

 bion arteko artu-emanak

 leunduko dizkitzuena,

 eta semeei utzi aal dezuen

 erentzirik ederrena.

 4.

 Azkenez, baña ez gutxiago,

 zaindu euskalduntasuna,

 ezur, sañetan, arpegi, itxuran

 dagerkigun nortasuna:

 Zaindu arbasoek ta lur maite

 eman ta utzi diguna:

 oitura zaarrak, euskera zaarra,

 izaera euskalduna,

 geu-geu egiten gaitun "zer" orren

 aragi, ezur ta guna.

 5.

 Betirako "bai" esan aurretik

 aldare onen oñetan

 zorion utsa opa dizuet

 neurri gabeko neurritan,

 Maitasun-garra sortu zuanak

 zuen bion biotzetan

 geiagotu ta zaindu dezala

 su ori beti garretan,

 su eder ori itzali ez dedin

 sekulorum sekuletan.