Haize hegoa Garazin

Duny-Petre, Pierre (Manech, Manex)

 1

 Herriko haize-hegoa,

 Zuri milaka goraintzi!

 Jeiki-ta, churi-churia,

 Ufatzen duzu gochoki.

 Negian, bero-beroa,

 Horma kentzen duzu bethi.

 Udan aldiz, aro tcharra

 Baztertzen duzu polliki.

 2

 Bana zer gertatzen da?

 Min egin dauzute naski

 Orroaz joaiten zira

 Lasterka menditik beiti!

 Ibañetako lephoa

 Ez duzu ttipiegi?

 Edo gauaz, Basa Jauna

 Etzindukeia ikusi?

 3

 Bardako haize maitia,

 Ezin ibiliz emeki,

 Arrunt erhotzen ari da.

 Atzo nigar, egun irri,

 Huchtuz edo marrumaka,

 Haur itsusi bat iduri,

 Badoa zalapartaka,

 Zernahi Jo ta aurtiki!...

 4

 Artzainak, erroz gohora...

 Ardiak, itzuliphurdi...

 Bonetak airian, eta

 Kotak belaunetik goiti.

 Gure Kattalin ergela

 Ichterrak ere ageri!

 Debrien haize chirtchila,

 Zer behar dugu ikusi?

 5

 Ikusi? Jeusez. Haizia

 Jin orduko da ihesi...

 Eta geroztik euria:

 Berriz behar dugu busti.

 Atzo, hor zagon oihuka

 Odeiak haizatu nahi.

 Egun, ichilki joan da,

 Ta bere chedeak utzi.

 6

 Kaskoin batzu hala dira:

 Buru bero, aho handi,

 Merke dute balentria.

 Lehenik, azantz ausarki,

 Izigarriko kalaka.

 Bana gero, tantiruri...

 Gure «Pullo», kakin eta, (1)

 Etcherat ari eztiki!...