Aztaparrekin

Duny-Petre, Pierre (Manech, Manex)

 1

 Ho, Manex laboraria!

 Nola lanak dituk egin,

 Galdurik hire sehia?

 Geroztik ez duk atsegin:

 Alorran aste guzia,

 Edo, bilakatuz hargin,

 Berritzen duk barrukia!..

 Hortzetan irri batekin

 Da sortzen errepostia:

 Ari niz aztaparrekin,

 Jinkoa laguntzailia!...

 2

 Maitatuz hire mendia,

 Izanik artzaina, Pattin,

 Nola biltzen duk esnia,

 Bakarrik kotxiarekin?

 Eri zelarik ardia,

 Tortin, lamin, edo sorgin.

 Hiaurek duk sendatia!...

 Ez baita burutik arin,

 Pattinek, ezti-eztia:

 Ari niz aztaparrekin,

 Jinkoa laguntzailia!...

 3

 Piarres arrantzaria,

 Galerna sortziarekin,

 Binbilikatuz untzia,

 Arraina hartzen duk berdin.

 Gaixto delarik leria,

 Nola duk, behinez-behin,

 Tiratzen sare bustia?

 Kulunkan gibelez-aintzin,

 Mintzo da itsasturia :

 Ari niz aztaparrekin,

 Jinkoa laguntzailia!...

 IGORTZE

 Baduka bihotzian min,

 Eskual abertzalia,

 Ikusiz nola den zikin

 Arrotzen nahaskeria?

 Ez baduk nahi leherrin,

 Begirazak mintzairia,

 Hiaurek aztaparrekin,

 Jinkoa laguntzailia!...