Lehen euskal-hitzak...
Iratzeder
Lehen euskal-hitzak
idatzi dituen
euskaldun bihotzak
zer goi-sua zuken!
Latin eta latin
dena San Agustin...
Jainkoz baitzen hazi
sua zaio jauzi.
"Jainkoaren Hitza
gaur euskaraz mintza!"
Beneditar bat zen
Errioxakoa.
Zuk, zer zuen izen,
dakizu, Jainkoa.
Aurten mila urte,
zagon nolaz ote
nolaz Jaun-Goikora
euskaldun-mintzaira.
"Jainkoaren Hitza,
gaur euskaraz mintza"
Behar baitu lurrak
loren eder hura,
Errioxatarrak,
ikasi euskara.
Aspaldi bezala
loratu dadila,
Logroņo aldean,
bihotz ezpainetan.
"Jainkoaren Hitza,
gaur euskaraz mintza!"
|