Ziberotik Arabara
Davant, J.L.
1
Pena orok egun batez, gainditzen bere gailurra:
Ortzadarrak loratuko, berriz Euskadiko lurra.
Su garrean gesalduz negu beltzeko elurra,
Arabari, hegiz-hegi, Xiberoaren agurra.
2
Agur, agur, bihotzetik, Gasteiz eta Estibalitz!
Hamaiketan hartz maltzurrak eraso zaitue bortitz,
Eliz atean utzirik elur petik zenbat korpitz
Et'Euskara ehortzirik, mingainetan erdaldun hitz.
3
Batean arrano beltza, bestean urzo apala,
Euskaldun Herria beti zeruz zeru badabila
Itsas uhaina golkoan, bere iparraren bila
Sartaldetik zu zaitugu, Araba, beste hegala.
4
Korpitzetik moztu nahiz, biak gaituzte berezi,
Erdaraz galkatu eta makilaz ardura hezi.
Horregatik, haurrideak, ez dizagun orain etsi,
Etsaiak ezin baitigu portua gehiago hetsi.
5
Arabako Euskaltzaina, ekaldetik zorionak.
Izan gaiten lagunekin hizkuntzaren artzain onak.
Ararteko ditugula Nafarroako Baskonak,
Pitz ditzagun Xiberoa et'Araba euskaldunak.