Bar, bar, bar...
Davant, Jean Louis
1
Baitzen erakasle bat, iduriz abila,
Bere ustez segurrik langile ixila,
Giscard-ek eman zion ministro makila
Geroztik herriz-herri, «bar, bar» badabila.
2
Horren parabola aise daite finka,
Uste baitu gaudela aserik zotinka :
«Herritarrek dezagun gerrikoa tinka!»
Ezagutzen ote du zenbatzuen kinka
3
Berak hasteko ez du goserik pairatzen
Horren aitzindeak du ongi erakusten.
Jaunaren zorionaz bozkaria gaiten...
Baina gureaz ez da hanbat axolatzen.
4
Ele onak ez dauku sabela beteko,
Ez eta lausenguak arima haziko.
Egonen ote gira haundien meneko?
Giderrak har ditzagun guhauren eskuko!
5
Gizon barbalot horri erran dezakogun:
Apur bat ixildurik, behar gaituk entzun!
Gazteria Parisez aserik duk egun
Euskal-Herria bizi nahi duk euskaldun.
6
Zer eskatzen derauku Euskal-Herriak,
Eta partikulazki gure gazteriak?
Tokian bizitzeko lantegi berriak!
Ez dauzku ekarriko Barren jukutriak.
7
Lana Herrian eta Euskara plazara,
Erroietarik libre laborarien lurra,
Herriko gobernua Herriko-Etxera
Eta basa profetak Frantzian behera!