Osasuna, mundu honetako ondasuna
Cazabon Amigorena, Antton
1
"Goizean goizik jeiki ninduzun"
doinua harturik lagun,
bertso alaiak aire tristean
ea moldatzen ditugun.
Gauza serio eta sakonak
esaten gau eta egun...
Gizarte triste ta ilun hontan
far ere egin dezagun.
2
Gutxi jatea hobea dela
ematen diogu antza,
urdaila ere zaindu behar da
sartuz koipe eta saltsa,
gozozaleak izanagatik
bota lasai nahiko gatza,
ase ta ere jarraitu jaten
nahiz mahaitik ezin altxa.
3
Ogi zuria, ogi berra
labean egon berria,
afal aurretik, alai ondoren
ezin harturik neurria,
edozerekin ongi sartzen da
gauza estimagarria.
Ogi pixka bat osasuna da,
ezak sortzen du larria.
4
Aza, txorizo, urdai giharra
babarrun ta odolkia,
mondongo puska lodikotea,
atzetikan sahieskia;
gibel punta bat saltsan jarrita
hasiera egokia.
Porru patata osasuna da,
ondasuna txerrikia.
5
Saltsan jarrita arkume ona,
arkume ona erreta,
olio grasaz esku, aurpegi
eta kokotza beteta.
Haragi pixkat presta dezagun
errez jango dugu eta.
Entsalada bat osasuna da,
ondasuna da txuleta.
6
Sagardo ona, ardo hobea
hoien atzetik gabiltza,
hortatik aski izan ezkero
alaitasunaren giltza.
Zumoak hartzen hasten bazara
oso sano ez zabiltza.
Ur hotz gardena osasuna da,
ondasuna ardo beltza.
7
Postretarako soilik mamia,
beteko al da kupela,
bizkotxo pixkat, ta flan txiki bat
gehiegizkoa ez dela;
tarta ere jan egin beharko
ondatuko da bestela.
Fruta freskoa osasuna da,
ondasuna da pastela.
8
Horrenbeste jan, hainbeste edan
irtenbide bat bakarra:
Kafearekin sartu ditzagun
kopa batzu barra-barra;
pattarrik gabe, txanpainik gabe
nahiko atari kaxkarra.
Kamamiloa osasuna da,
ondasuna da pattarra.
9
Gorputz guztia -a tope- dago
gorputza eginik zisko,
orain birikak ketan beltzatuz,
eztulka hasteko listo;
piztu ditzagun zenbait txiskero
eta piztu zenbait misto.
Oxigenoa osasuna da,
ondasuna Montekristo.
10
Afaldu eta orain etxera:
Hori gauza aldrebesa,
gizon jokatu, kristauak ez du
izan behar hain eskasa;
sartu dezagun alkohol pixkat
estutu arte arnasa.
Lo egitea osasuna da,
ondasuna da gau-pasa.
11
Bi pausu eman behar dira ta
goaz kotxearen bila,
exeri eta nekatu gabe
gidari on ta abila.
Eta nekatu nahi duena
oinez ibili dadila.
Oinez joatea osasuna da,
ondasuna berebila.
12
"Osasuna da mundu hontako
ondasuna" diotenez;
dena kotxean, pausu bat ere
ezin dugu eman oinez,
gauez parranda, gauez zurruta,
eta ohean egunez.
Gutxi jatea hobea baina,
ipurtzuloraino gainez.
13
Zer arraio da orduan mundu
honetako ondasuna?
Bertso hauetan aurkitu dugu
egitazko erantzuna.
Gure gorputza nola ondatu,
da gure eginkizuna,
gero begiak zerura jaso
ta eskatu osasuna.