Coeli enarrant gloriam Dei (XVIII'garren salmua)
I
Zeruak, eta batez ere eguzkiak Yaungoikoaren aunditasun ta edertasuna erakusten digute.
Ortziek salatzen dute
Yainko Yaunaren ospea,
izartegiak aipatzen
bere esku-lanen andia.
Egun batek besteari
igortzen dio elea,
ta gau batek besteari
ematen dio berria.
An ezta itzik, ez elerik,
ezta entzuten oiurik.
Ta alaz ere lur guzira
edatzen da beren otsa,
lurraren azken-mugetan
entzuten aien mintzoa.
An goian dio egoitza
apaindu eguzkiari.
Au yaikitzen da goizean
txairo, bizkor ta poztari,
bere gelatik eldu den
ezkonberri bat iduri.
Erraldoi baten antzean
alai da bidera yauzten,
ortzi-alderdi batetik
goizean goiz abiatzen
ta beste alderdiraņo
bere birunda egiten.
Aren bero ta argiari
deus ez dakioke estali.
II
Yainko-legearen bikaintasunak
Yaunaren legea-guziz bikaiņa da,
animak azkartzen ditu;
aren aitormena-siņesgarria da,
bakunak zuurtzen ditu.
Yaunaren manuak-txoil zuzenak dira,
alaitzen dute biotza;
aren agindua-guziz garbia da,
argitzen ditu begiak.
Yaunaren beldura-txukun aratza da,
sekula irauten duena;
Yaunaren epaiak-ziņezkoak dira,
zuzenetsiak guziak.
Urrea, bai urre-garbiena baiņo
opagariago dira;
eztia, bai ezti-orrazea baiņo
ezti gozoago dira.
Zure manu oiei-gogo emanez da
zentzatzen zure morroia;
lege ori zintzo-betetzen dutenek
badute sari nasaia.
Baiņan ai! nork uler-ta yakin ditzake
utsegin eta obenak?
ez ikusi egin-barka zaizkidatzu
ezautzen ez ditudanak.
Griņa tzaretatik-begira nazazu
ez dakizkidan nausitu;
orrela izango naiz betegin garbia,
oben andirik gabea.
Zure gogarako-izan bitez beti
nere agoko yardunak;
zure aitzinean-beude beti aurkez
nere biotz-gogapenak.
Zu, Yauna, nere estalpea
ta nere berreroslea.
