Donoztiriko xahar grinatuari...

Borda, Itxaro

 1

 Delakoan pentsamen sanoen eskola

 «Herria »-k agertu du, harturik axola,

 Pierres Bidegaray-ek idatzirik hola,

 Zahar-gazten arteko gaurko parabola!

 2

 Parabolaz ari zen Jesus lehenago

 Etsiturik laiteke egun hor balago,

 Ikusiz nola diren gero ta gehiago

 Hura bezala mintzo giza seme frango...

 3

 Laguna, bertso hauek zuretako dira

 Zu bederen ideiaz gaztea baitzira;

 Zoritxarrez, ordea, eguzki distira

 Histu duzu erranez: «zahartuak gira!»

 4

 Zure denbora segur, denbora ederra

 Gozoa zen orduan euskaldun bazterra...

 Ideietan munduak egin du lasterra,

 Eta «Bal»-ek ekarri biziaren herra!

 5

 «Bal»-etan ez zira ez sekulan usatu

 Nolaz ditutzu beraz hein aise aipatu?

 Diozu dela kasik joaitea bekatu

 Hobeko litazkela arras debekatu...

 6

 «Gauaz ez dela onik, baita debruena!»

 Hauxet da solasetan zure hoberena,

 Halere ez Jainkoak erraiten duena

 Baizik zure iritzi egizkoa dena...

 7

 Neskatxek dituztela espainak gorriak

 Mutilek biloetan sortuak zorriak...

 Moda berriak nondik dira etorriak?

 Oraiko arrosetan, beti elorriak...

 8

 Garbi ta bertutedun lehengo gazteak

 Ari ziren lanean egunak, asteak;

 Ez du baliorikan horren ahanzteak:

 Bitxiki bazabiltzan gizon-emazteak...

 9

 Moldaturik zinuen kantore arina

 Parabolaren gisan agerturik mina;

 Oihala ez da aurkiz bakarrik egina,

 Egun gazte bazina, zintake berdina!

 10

 Orain uzten dut luma, beharrez bukatu

 Ez nuke auzi alfer heu nahi luzatu;

 Irakurleek berek bezate trenkatu,

 Nik ez dut nahi nere adina ukatu...