Biarnoko adiskide bati...
Borda, Itxaro
1
Adiskidantzaz nahi zaitut gaur euskal bertsotan agurtu
Erakaslea zinelakoan eta ni ikasle mutu
Hiru lau urtez sobera luzaz ez zintudan ezagutu
Geroztik zerait beldurra joan, iragan hura damutu...
2
Ez dukezu ez edirenen hor bertso aide honen funtsa
Neronek ere zergatik egin dituztan ez dakit untsa...
Ez dukezu ez konprenituko mintzatzen dutan hizkuntza
Zer inporta du kidetesunak haldin badu zabalkuntza!
3
Ahuñamendi departamendu hure zutenean sortu
Berex jartzea zoritxarrean ez ginuen nehoiz sortu...
Gure arteko hartu emanak zituzten beraz gogortu
Eta batean bizi araziz ginen elgarri elkortu...
4
Hoberena da Biarnokoa, hoberena euskalduna
Hori ditake herri askotan usu entzuten duguna;
Hurbilagotik miatzen bada lurreko uren haguna
Ez da ikusten gaurko orduan alaitzekorik laguna!
5
Zureak eta nere herriak dute kondaira berbera
Lokarri bakar daukatelako Nafarra handia bera...
Oraindik gaude hilak erdiak hihotzetikan minbera
Noizhait segitu dugulakoan zapalzalea sobera!
6
Zure herriak, adiskidea, badu zerbait handitasun
Eguerdiko goiko mendiak betidanik larritasun
Aintziretako ur gauden harek goizalderat argitasun
Eta nik uste zelai zabalak biziarentzat maitasun!
7
Nere herria irriz ari da hegoaz larrazkenean
Iratze gorri haien gainetik urxoak lohazkenean...
Etxeak ere bozkariotan sartzen dira azkenean
Sua pizturik haurrak beroan uroski ditazkenean...
8
Bi herrietan gizonak beren ohiduraz biluziak
Laborariek hartu dituzte treinak hor eta untziak,
Bi herrietan gizonak beren ohiduraz biluziak
Larru soziala hautsirik dago; galduak gara guziak.
9
Herri umilak gabiltza biak zapalkuntzaren kargutik
Noiz ateratzen ahalko gara minorien bekatutik?
Zoritxarraren kontra hasarrez bidez joateko zutik
Euskal semeak biarnesekin ibil ditela eskutik...