Uholdeak

Bilbao, Jose R.

 Mari, nahi zaitut agurtu

 ahal dudan neurrian gurtu

 zu ere egun hauetan baldin

 ez bazara urtu.

 Zelan ez duzu neurtu,

 jo ta zerua apurtu?

 zure leizeak ez ote ditu

 txizontzi bihurtu.

 Erdi itoa barea

 gu bezain errugabea

 zer gertatu den galdezka dabil,

 zurbil, herabea.

 Bilbo ez da orubea

 ur-mailuen ingudea,

 lainoen negar luzeak dakar

 ondoren gurea.

 Zirudin zela betiko,

 dena murgildu ta kito,

 zuhaitzak heurak deserrotu ta

 itsasoan ito.

 Inoiz ez, ta, belauniko...

 hodeiek zer ekarriko...

 gure Herriak oraingoz behintzat

 iruntsi du nahiko.

 Zuhaitz etzanak jateko?

 lupetzez elikatzeko?

 ez da astirik era berriak

 ikasten hasteko.

 Oroipena da gordeko,

 berriro datorreneko

 ubide denak zaindu beharko

 askotaz hobeto.

 Neurriz kanpo jarioa

 ondasunei adioa

 aurrerantzean etorkizuna

 da kontrarioa.

 Hauxe da desafioa:

 ea gure balioa

 egiztatzea goren mailara

 dagoen igoa.

 Bizkaia mudurri dago

 ia ezin du gehiago

 hain une latzik aspaldi hontan

 ez bait du igaro.

 Kanpoan hainbestek: bravo!

 gure etsaia akabo,

 kanpo-dolumin asko agertu

 ta barre deungaro.

 Samina?, soilik geuregan

 erraz daiteke antzeman

 bai begiradan, bai tresnerian

 ta baita banderan.

 Baina ba dakigu zelan

 ardo mingostu hau edan:

 hortzak estutu, burua jaso

 ta aurpegi eman.

 Ea zer berri Bermeon?

 ederrak dizkigu emon,

 arrezkeroztik esku-hutsurik

 ezin inor egon.

 Ea alkatea non dagon?

 hortxe datorku, asteon,

 Malaga puntan bakaziotan

 gizona bait zegon.