Ogia

Bilbao, Jose R.

 1

 Lan nekagarri baten ondoren

 eskuratzen da garia

 uruna gero legamiagaz

 labean jarri lodia.

 Barrutik dauka mamin gozoa

 kanpotik azal horia;

 baina gaurregun hori ote da

 eguneroko ogia.

 2

 Gure arimak ez du ahorik

 baina ederra gosea

 eta nabarmen ikus daiteke

 ez dagoela asea.

 Hau ulertzeko ez da izan behar

 irudimenez luzea:

 ez al duzue zeuok asmatzen

 bihotzaren oinazea?

 3

 Hori dela-ta hartua dugu

 txakur gosetien antza

 ogia bila ari garela

 harantza eta honantza.

 Baina noizbaiten berdinduko da

 justiziaren balantza:

 ba gara eta, ez dugu galdu

 aldaketa-esperantza.

 4

 Gaur ardo hutsez konformatuko

 dira batzu beharbada

 a(ha)ztuta zein den askatasunak

 atean duen aldaba.

 Gure Herrian geldik egonga

 negarra ezin akaba:

 bakeak beti izan behar du

 justiziaren alaba.

 5

 Maitatzen diren ideiak ezin

 dira bazterrean utzi

 nahiz le(h)iatzeko eskutan izan

 momentuan tresna gutxi.

 Oraintsu, preso dauden anaiek

 digute hau erakutsi:

 arima-ogi hori lortzeko

 gorputz-goseari eutsi.

 6

 Norbaiten alde jartzen bazara

 besteren bat duzu kontra

 zail izaten da denen aurrean

 garbi eukitzea ondra.

 Ogi-kontutan ari gara ta

 nire eritzia horra:

 hemen okinak faltatzen dira

 ta pasteleroak sobra.