Donoztiriko klika

Bidegaray, Pierre

 1

 Jainkoak duenian argitu herria

 Ordukotz bakotxa zen aiduru jarria

 Orok jakina gatik klikaren berria

 Nork zuen uste zeta hoin xoragarria

 2

 Gazte artean zenbait baitziren zaharrak

 Hartze dituzte zinez gu denen eskerrak

 Adina joan gatik, oraino azkarrak

 Harrotu dauzkutela elizan bazterrak.

 3

 Badute ba dohaina hoinbertze urtetan

 Hoberik ez zen nehor han ziren gaztetan

 Bainan beldurtzeko da bermatuz artetan

 Nagusituko diren ondoko astetan.

 4

 Aitarekin bi seme nun dire ikusten

 Ez zuten segur tropa batere itsusten

 Bainan etsenplu on bat herrian emaiten

 Badakitela ederki soinuaren joiten.

 5

 Meza ondoan bazen bil tokian haro

 Bazakiten zutela bazkaria gero

 Aspaldi huntan zauden bestaren espero

 Libertituz bakian elgarrekin oro.

 6

 Jaun erretora zuten han mahain burian.

 Ezagun zuen aise zela omorian

 Bere tropa baitzuen dena ingurian 

 iduri zagoela zeruko lorian.

 7

 Bazkal ondoan baitzen soinua ezagun

 Etzuketen beldurrik, nehorentzat nehun

 Nun, nahi,agertzeko;zoin ez ote ziren hun

 Joiten zutela airos ozen eta legun.

 8

 Gure desira zer den dugun denek jakin

 Erranen dugu huritan kantuz plazarekin

 Gazteak entrenatuz hola, zaharrekin

 Klika eder hoi atxik, luzaz elgarrekin.