Ostoak
Battitta
1
Udazken oroz osto iratze hasten direnean gorritzen
Kasik hedoika ainaraņoak elgarretarat hor biltzen
Haize epel bat hego aldetik betbetan da abiatzen
Iratze eta osto gorriak laster baititu idortzen
Hoiek oro ikusi eta gogoetan ni plantatzen.
2
Beranduxago kasik arbola guziak dira buluzten
Udazken oroz munduan barna zenbat osto den erortzen
Primaderaren bastean berriz berriek dute pusatzen
Menderen mende ta urte oroz beti berdintsu gertatzen
Gizona baino zuhurragoko norbaitek du kudeatzen.
3
Gizonek ere egun daukute egiten osto ainixko
Primaderak ez-ta udazkenak ahalik ez hauendako
Haize hegoak ere ez ditu sekulan hauk idortuko
Horren gatikan denbora gutti dira egonen funtsezko
Maiz kanbiatu behar baitira lagunaren mozkintzeko.
4
Ez delakoan kreatzaileak emanekin kontentatzen
Munduan barna hoinbertze gizon ari paper osto eiten
Egun guziez zenbat arbola hortakotz duten funditzen
Hartua duten bide trixtetik ez badira apartatzen
Ostorik ez da egiazkorik laster batere izanen.
5
Kreaturetan zernahi mota kreatzaileak du egin
Bai-ta ezarri hazkurriaren biltzeko manerarekin
Eta bat salbu guziak dira egon harek emanekin
Menderen mende bizi-modua hoientzat egon da berdin
Baņo hura gizona dugu urgulu-ta zentzurekin.
6
Ainitz urgulu, ez aski zentzu, horra zer dugun gizona
Dituenekin ezin kontenta gehiago nahi duena
Joko orotan beharrez izan azkarren eta lehena
Deusetan ez du errespetatzen kreatzaileak egina
Hola segituz daiteke tronpa sobera joanik aintzina.
7
Iguzkia da goiti abian; egunak ari luzatzen
Arbol gainetan aldaxkak berriz nun-nahi dira agertzen
Argi punttako xoxo-ta xori xoragarriki kantatzen
Ainaraņoak ere hor tugu hasiak ôhantz egiten
Salbu gizonak, guziek dute primaderan parte hartzen...