Euskaldunak
Battitta
1
Euskaldunak zaizkigu borrokari lotu
Batasunak nun-nahi holaxetan lotu
Zerk bade ditu
Orai pusatu
Nahiz gobernatu
Dei, hori lehenago nolaz ez aditu?
2
Herri ttipienetan zerbait zakitenik
Oraino ez aspaldi bi gizon bakarrik
Ez-ardurenik
Etzuten onik
Ez-ta aditzerik
Apeza Euskalduna, errienta ez haatik.
3
Errienta gorputzez apeza arimez
Herria argitua beraz bi gizonez
Tzar edo onez
Heien erranez
Bainan beti bertzez
Holaxet moldatuak guk nahi edo ez.
4
Euskal-herria dela bai toki ederra
Ederra segur bainan apur bat xuhurra
Ttipi alorra
Asko patarra
Len dorpe gogorra
Hortakotz baita pobre Euskaldun xaharra.
5
Denak eskoletarat orai da bakarrik
Pobrearenzat lehen etzen eskolarik
Horra zer gatik
Euskal-herritik
Ez jalgi gizonik
Beren herria azkar atxik zezakenik.
6
Apez-gaiak bakarrik lehen eskolatzen
Horra zer gaxik zuten ainitzek aditzen
Jauna mintzatzen
Haurrer galdatzen
Denak utz zitzaten
Eskolan ikasteko arimen salbatzen.
7
Egun bizi-modua arras bertzelatu
Hamasei urte arte denak eskolatu
Ainitz ohartu
Zutela gostu
Bai eta segitu
Ber-denboran zerutik galdeak guttitu.
8
Eskolan Euskaldunak zaizku iratzartu
Berberetu beharrez dira abiatu
Zenbat zeraiku
Hola agertu
Indar eta gudu
Guzien hel-bidea nahi nagusitu.
9
Nagusi izaitea gustatzen orori
Sortzetikakoa da gutizia hori
Ttipi-ta handi
Guziek nahi
Guhauren nagusi
Jende bezenbat behar hortakotz aberri.
10
Aberria enetzat baita sor-lekua
Haurtasuna goxoki nun den pasatua
Ez hautatua
Ez mugatua
Hola gertatua
Bertze aberri oro nik deitzen mundua.
11
Hoinbertze aberri-ta hoinbertze ikurrin
Zeren gatik ditugun nahi nuke jakin?
Bere mugekin
Eta armekin
Zenbat egiten min?
Hoin aspaldi hasiak eta beti berdin.
12
Ikurrin xuriño bat noiz da ikusiko?
Orotaz onhartua bertzen suntsitzeko
Xuriendako
Ta kolorezko
Baño denendako
Haren gerizapean bakean biziko.
13
Gizonaren ahaia hoin baita ustela
Beti bakeaz mintzo ez egin sekula
Mendeak hola
Beti dohala
Emendatuz gerla
Lepo-xuri abilek mozkinduz ODOLA.
