Bat lendakari guztientzat
Battitta
1
Euskal-Herriko argitzailea, har, astekari «HERRIA»
Ene ganikan merezi baitu agur bat hunkigarria
Zuk baitaukuzu agertarazi bertsu agile berria
Erdi xoro-ta erras bitxia bainan ez irringarria
Ikusten baitu ahulek duten ahal deitoragarria.
2
Kreatzaileak baiteraut eman jite oso baketsua
Horra zer gatik enetzat beti etsai agertzen gudua
Izan dadien abertzaltasun edo fedez sustatua
Maleruski sobera ardura dugu ikusten fruitua
Bide berean tematzen dena zenbat ahal den itsua?
3
Jende guziak iur huntakoak nunbaitekotz abertzale
Bakotxak bere Herria dauka bertze oro baino hobe
Ikus-molde hai lepo-xuriek ongi mozkintzen baitute
Elgarren kontra herra saltatuz gudukarazten gaituzte
Behatu ongi, ikus bertzea, gu bezala dela jende.
4
Kreatzaileak eginak dira bakar-bakarrik egiak
Gizon abilek zenbat maneraz denak arrunt nahasiak
Hatxeman mugak desegin eta zenbat kreatu berriak?
Eginez hola ainitz Aberri elgarren etsai gorriak
Batean lanera bertzean gudura, hola, mozkintzen pobreak.
5
Hiruetarik baño in nahiz borrokatzen zareztener
Zuen xederat heldu ondoan geldituren are-oker
Lehen bezala berdin-berdina Aberri eskuin-ta ezker
Gudu berari segi zaitezte, eta, bertze oro leher
Baño bakarrik geldi dadien zuen lan onari esker...
6
Nun-nahi egun talde berriak, hor, Aberrien-arteko
Han nunbait urrun gaizki doatzan gertakari salatzeko
Gero ondotik eskuak luza amoinaren galdatzeko
Direnaz geroz mundu guziko xafratu solegitzeko
Zerk ote bada ditu trabatzen guziek bat egiteko?...
7
Mundu guzia Ikurriñ batez dugunean apainduko
Zer Aberria berdin ederra abertzaile denendako
Bakatxak bere lehendakaria orduan du aurkituko
Holako egun xoragarria zaikunean argituko
Bozkariotan mundu guzia «EUSKADI» dugu deituko...
8
Haurra nintzeno burrasoekin ikasi dudan Euskara
Eskolen bidez lantu-gabea gelditu baita ber-bera
Horren bertze hitz zure bertsotan enetzat arrotz baitira
«Mikelats» jauna, ezin naiteke arriba zu aditzera
Lantuetarik zarelakoan nekez baterako gera.