"Aihen ahula" irakurtu ondoan
Battitta
1
Arginborda-ko same hiri naiz mintzatzen
Familia guzia gaituk ohoratzen
Laborari seme bat liburu egiten
Euskal-herrian ez da ardura ikusten
Lan hori orai arte Apezenzat baitzen.
2
Ene ahalak dire sobera ahulak
Hortakotz ezin ditut ikertu bazterrak
Jakiteko arrazak nun tuen erroak
Nik ezagutu tudan arbaso bakarrak
Larrondoko aitatxi-amatxi xaharrak.
3
Sortu haizen orduko dena miseria
Erakusten baitaukuk gorputz bat eria
Bakotxak ezin baitu hautatu zortia
Hemen ikus Gizona zenbat den ttipia
Hunek zapa baleza gure Urguluia.
4
Aihen ahula baituk hire lana deitu
Zeren gatik ote duk izen hori hartu
Hire burua nahi ote duk ttipitu
Holako gutti zaukuk oraino agertu
Guziek nahiago baitugu goratu.
5
Aihen ahula bainan emaiten jus ona
Ongi pisatu gabe ez otoi kondena
Ikusterat entsaia zein den hoberena
Bertzetaz baliatzen zaikun indar duna
Ala indar gabeko justu-ta zuzena.
6
Guziak hoin polliki baitituk agertzen
Hirekilan garela zaikuk iduritzen
Artoa bildu eta ondotik xuritzen
Negua jin denean gero urde hiltzen
Nahi edo ez nahi gaituk berriz haurtzen.
7
Hire sukarra ere segur konprenditu
Aspaldi du dudala nik ere senditu
Noiz ukanen ote du horrek aski kutsu?
Mundu zabal guzian dadien hedatu
Bai eta jende oro horrekin eritu...
8
Ene denboran ez dut ainitz irakurtu
Bainan segur halere zerbaiti ohartu
Diru dunak agertzen abil eta brestu
Pobreak aldiz beti zozo eta trastu
Aihen ahulak bertze biderik du hartu.
9
Lana akabatzean holaxet mintzo hiz
Bizi modu orotan haizela aprandiz
Agian izanen da hi iduri ainitz
Ongi egiten ari oraino ikasiz
Denak dazkiten hoitaz ni mesfida bainiz.
10
Aihen ahula zaitak labur iduritu
Kasik hasi orduko baitzait akabatu
Hunekilan baitaukuk eman apetitu
Hire ale lekuak behartu zabaldu
Izan dezagun bazka arte satifatu.
11
Hunan irakurtzeak baitaut eman indar
Zer zaitan gogoratu deiat erran behar
Tronpatzen banaiz ere ez otoi gaiki her
Ene odol erdia ere baita Landart
Behar ginikek ongi ezagutu elgar.
12
Aihen ahulak dezan uzta nasai ekar
Euskaldun guziek dugun susta elgar
Gizon eta Emazte, gazte eta xahar
Xibero, Amikuze, Labur, Baxenabar
Orok older berean Agur Daniel Landart.