Kopla berriak Gabonetan jarriak
Baraiazarra, Luis
Kanta-kantari ta alaitasunez
jotzera gatoz pregoia
eta oraintxe argitzen zaigun
lainotsu den zeru-goia.
1.
Haitzean sortu elorria
lurretik du jatorria;
gaur jaio zaigun Jesus Haurrari
eman ONGI ETORRIA.
2.
Gau ilunaren tristea
goiz-argiaren biztea;
Xemeineraino heldua zaigu
Aingeruen Albistea.
3.
Zapolatik Elkorrera
bakoitza bere alorrera;
Salbatzallea azaldu zaigu
gure mundu gogorrera.
4.
Arretxinagako haitzak
menderatzen oso gaitzak:
gure Herrian iraungo al dute
Jesus Haurraren emaitzak.
5.
Artibaitik Ondarrura
ltzul-inguruka ura;
gure bizitza legorreraino
dator Jesusen freskura.
6.
Markinako kale zarrak
gure kondaira susterrak;
judar-herrian dauka sorrera
Belenen jaio den Haurrak.
7.
Pelota-tokia planzan
Markina hor bere saltsan;
Gabon-jaietan atso-agurak
ikusiko dira dantzan.
8.
Etxebarri ta Markina
Bolibar eta Bariņa;
zorionean bizi gintezke
kristau jatorrak bagiņa.
9.
Negoak berekin hotza
kristal-dizdiraz izotza;
Eguberriek gozotu ezik
benetan sasoi mingotsa.
10.
Hegaz dabil txoriņua
dena poztasun doiņua:
Belen aldetik izartxo batek
egiten digu keiņua.