Koblak
Bankarra
I
Batzu bertzer ari gira, bethi gaizki erranka!
Jelosia gaichto batez, guziez mendekuka
Itzal bat ikhus orduko hura khonda oihuka
Ez oraino den bezala emendatuz doblezka.
2
Jeloskoak harturikan baigaude errabiaz.
Bethi zerbait erraiteko bertzen bizi moldiaz.
Guhaur bethi zuzenean juja gure mihiaz.
Bekhaitzez gaudelarikan, berzek duten ongiaz,
3
Batentzat diogu hola, bertze batentzat hala:
Hau alfer, hura gormanta, bertze bat ezazola.
Hori berriz dabilana behar ezten bezala.
Ari gira erasian, holache tirahala,
4
Lasto bat ikhusten dugu, bethi bertzen begian.
Pitrailikan handiena, behinere ez gurian.
Gure hutsak bethi kuku gibeleko zakian.
Bertzenak aitzinekoan gorderik agerian.
5
Nehork ez dugu eskutik, bertzeen jujatzeko,
Bakotchak gure itzalak, baitugu jasaiteko.
Hutsik gabe denik nor da, bertzer deus erraiteko?
Guhauren burua dugu bakharrik chuchentzeko.
6
Arbolarik ez da nehon, ez duenik itzalik:
Halaber ez da gu baithan, thatcharik ez duenik.
Batzuek hau, bertzek hura, badugu ikhusirik,
Nor bera garbi ez deno, egon bedi ichilik.